Прадпрымальнікі сёння плануюць новую акцыю ў цэнтры Мінска

Яны змагаюцца за адмену дэкрэта № 222, які зрабіў практычна немагчымым гандаль таннымі таварамі легпраму з расійскіх аптовых базаў. Пастаўшчыкі, у якіх беларускія іпэшнікі набываюць тавар, не выдаюць ім належных сертыфікатаў, з-за чаго ў сябе дома прадпрымальнікі маюць праблемы з кантралюючымі органам. Браць на рэалізацыю тавар айчыннай вытворчасці для іпэшнікаў нявыгадна — ён занадта дарагі і недастаткова разнастайны.

З-за гэтых правілаў, якія пачалі дзейнічаць з 1 студзеня, большасць гандляроў вымушаная была спыніць працу. Цяпер на рынках і ў гандлёвых цэнтрах шмат пустуючых палатак і павільёнаў.

Раней прадпрымальнікі правялі дзве акцыі пратэсту ў цэнтры Мінска — яны адбываліся 15 і 22 лютага, па панядзелках. Цяпер ІП вырашылі выйсці на мітынг у нядзелю, калі большасць рынкаў і гандлёвых цэнтраў працуе і пустыя гандлёвыя месцы стануць больш заўважнымі.

Да акцыі плануюць далучыцца апазіцыйныя палітыкі, сярод якіх лідар Аб’яднанай грамадзянскай партыі Анатоль Лябедзька і сустаршыня аргкамітэту па стварэнні Беларускай хрысціянскай дэмакратыі Павел Севярынец. Апошні заклікаў усе палітычныя рухі краіны падтрымаць акцыю індывідуальных прадпрымальнікаў, паведамляе "Еўрарадыё".