Добрушская папяровая фабрыка атрымала кітайскі крэдыт на 350 мільёнаў даляраў

Генеральным падрадчыкам па праекту з'яўляецца кітайская "Карпарацыя Сюань Юань", з якой беларускі бок заключыў кантракт на суму 348,6 мільёнаў даляраў, перадае БелТА. Дзяржаўны банк развіцця Кітая выдаў крэдыт у памеры поўнага кошту кантракта.

"Асваенне вытворчасці мелаванага і немелаванага кардону дасць магчымасць закрыць імпарт аналагічнай прадукцыі і забяспечыць у поўнай меры патрэбнаці харчовай, лёгкай, медыцынскай і паліграфічнай галін беларускай прамысловасці", - адзначылі спецыялісты канцэрну "Беллеспаперапрам". Акрамя таго, гэты інвестыцыйны праект будзе экспартаарыентаваны. Магутнасць новай вытворчасці складзе 200 тысяч тон кардону ў год.

У канцэрне адзначылі, што асновай для вырабу новых відаў кардону паслужыць беленая хіміка-тэрмамеханічная маса, вытворчасць якой будзе забяспечана за кошт апрацоўкі мясцовай сыравіны - балансавай драўніны асіны і бярозы.

Рэалізацыя новага праекта дасць магчымасць рэалізаваць праграму тэхнічнага пераўзбраення і мадэрнізацыі асноўных вытворчых фондаў, павялічыць аб'ёмы вытворчасці і рэалізацыі прадукцыі. Таксама будзе павялічаны прыбытак ад продажаў, узрасце эфектыўнасць вытворча-гаспадарчай дзейнасці і палепшацца ўмовы працы персаналу добрушскай фабрыкі.

ААТ "Добрушская папяровая фабрыка "Герой працы" цяпер выпускае каля 90 відаў тавараў. Вытворчасць арыентавана на два асноўныя напрамкі - выпуск прадукцыі вытворча-тэхнічнага прызначэння і тавараў народнага спажывання (сшыткі, альбомы, блакноты, блокі для малявання і чарчэння, папера спажывецкіх фарматаў).