|
На 1 ліпеня 2008 года паводле афіцыйнай статыстыкі ў
Беларусі ў органах па працы, занятасьці і сацыяльнай абароны зарэгістравана 42,7 тысяч
беспрацоўных. Узровень беспрацоўя ўтрымліваўся ў сацыяльна дапушчальных межах –
0,9 працэнта да колькасьці эканамічна актыўнага насельніцтва. Сярэдні памер
дапамогі па беспрацоўі ў ліпені 2008 года склаў 46 тысяч рублёў (22% ад бюджэта
пражыткавага мінімуму).
Штогод Савет Міністраў зацьвярджае Дзяржаўную праграму садзейнічаньня
занятасьці насельніцтва.
У 23
гарадах - устойліва высокі узровень
беспрацоўя
Асабліва
вострая праблема занятасьці ў малых гарадах. Таму ўрад вызначыў сёлета 23 гарады з
устойліва высокім узроўнем беспрацоўя, у якіх сёлета загадана зьнізіць напружанасьць на рынку
працоўнай сілы, у асноўным за кошт стварэньня новых працоўных месцаў і
разьвіцьця малога бізнэсу.
Вядучы спэцыяліст Міністэрства працы і сацыяльнай абароны Галіна Трафіменка кажа,
што ў Дзяржпраграме мінулага году было
29 малых гарадоў, дзе людзям вельмі цяжка знайсьці працу.
У
новай праграме іх стала 23: “У шасьці гарадах ужо стабілізавалася абстаноўка.
Нельга сказаць, што там ужо ўсе праблемы вырашаныя. Але калі 10 гадоў таму ў
Ганцавічах Берасьцейскай вобласьці ўзровень беспрацоўя быў 10%, то сёньня мы
кажам ужо пра 3 – 4%. Гэта ўсё адно высокі ўзровень. Але ў параўнаньні прагрэс
ёсьць”.
У Берасьцейскай вобласьці гэта Ганцавічы, Мікашэвічы, Белазёрск, у
Віцебскай – Паставы, Новалукомль, Варапаева, у Гомельскай – Акцябрскі, Рэчыца,
Камарын, у Магілёўскай – Глуск, Хоцімск, Краснапольле, у Менскай – пасёлак Бобр і гэтак далей.
Шклову
пашанцавала, іншым гарадам - не
Беспрацоўе на пэрыфэрыі мяркуецца вырашаць за кошт стварэньня новых
працоўных месцаў у сфэрах абслугоўваньня, гандлю. Таксама за кошт субсыдыяў і
пазыкаў з Фонду спрыяньня занятасьці на адкрыцьцё сваёй справы. Прычым, пазыка
беспрацэнтная, субсыдыя беззваротная.
Натуральна, новыя прамысловыя прадпрыемствы будуюць толькі ў лічаных
гарадах. Да прыкладу, у Шклове – завод па вытворчасьці газэтнай паперы. Урачыстае
адкрыцьцё заводу газэтнай паперы ў Шклове ўжо адбылося, прысутнічаў на іх і прэзыдэнт
Аляксандар Лукашэнка. Але ніводнай тоны паперы завод дагэтуль не выпусьціў, хаця
штат завода ўкамплектаваны...
Паводле інфармацыі Міністэрства працы і сацыяльнай абароны у першым паўгодзьдзі ў Беларусі створана
1537 новых працоўных месцаў з выдаткаваньнем бюджэтнай пазыкі наймальнікам (у
2007 годзе – 3258).
З
пачатку году дзяржава дапамагла 1649 беспрацоўным
Што да дапамогі дзяржавы, за першае паўгодзьдзе аказана дапамога ў арганізацыі прадпрымальніцкай дзейнасьці
1649 беспрацоўным (у 2007 годзе 2837 чалавекам). Доля малых прадпрыемстваў і
індывідуальных прадпрымальнікаў, якія атрымалі дзяржаўную падтрымку ў 2006-2007
годзе, склала менш 0,05% ад іх агульнай колькасьці.
Ці лёгка
чалавеку пачаць уласны бізнэс? Як каму пашанцуе. Але папер, дакумэнтаў аформіць
трэба вельмі шмат. Чалавек павінен быць беспрацоўным, стаяць на ўліку ў Цэнтры
занятасьці, скончыць курсы і атрымаць пасьведчаньне індывідуальнага
прадпрымальніка. Толькі
тады у яго будзе шанец атрымаць беспрацэнтную пазыку. Трэба прадставіць
разгорнуты, абгрунтаваны бізнэс-плян. Пазыка гэта мае мэтавы характар. Да прыкладу, калі
прадпрымальнік атрымае ліцэнзію на цырульныя паслугі, па безнаяўнаму разьліку
за кошт пазыкі можна набыць абсталяваньне. Праўда, сумы невялікія, ад 1 да 3
мільёнаў беларускіх рублёў. А наяўных грошай не дадуць.
Прадпрымальнікі
вымушаныя згортваць бізнэс
Прадпрымальнік з гарадзкога пасёлку Узда Віктар Крываль
кажа, што адкрываецца малых прадпрыемстваў, афармляецца людзей ў індывідуальныя
прадпрымальнікі зараз вельмі мала,
часьцей людзі згортваюць бізнэс. Пасьля знакамітага Указу прэзыдэнта №760,
згодна зь якім індывідуальнаму прадпрымальніку нельга трымаць наёмных
работнікаў, вельмі мала хто перарэгістраваўся
ў прыватныя ўнітарныя прадпрыемствы. Віктар раней меў некалькі шапікаў, зараз у
яго з жонкай застаўся толькі адзін. Крама працуе без выходных. У адпачынак
пайсьці немагчыма, бо тавар бяруць з адтэрміноўкай плацяжу, за затрымку –
штрафныя санкцыі. Віктар падлічыў, што калі перарэгістравацца ў прыватнае
ўнітарнае прадпрыемства, пры гандлі прадуктовымі таварамі гандлёвая надбаўка складае 12 – 15%, ды яшчэ трэба
будзе аддаць 10% ад выручкі – будзеш у мінусе.
Выратаваньне
тапельцаў – справа рук саміх тапельцаў
Валянціна Кудлацкая з Верхнедзьвінску кажа: «Што тычыцца Верхнедзьвінску,
дзе ўзровень беспрацоўя даволі высокі, няма ў гэтай Дзяржаўнай праграме такіх
буйных прадпрыемстваў, якія дапамаглі вырашыць гэту праблему. Пабудаваная
невялічкая ЦЭЦ, але ж яна дала працу дзесятку чалавек. Будуецца вялікі мост,
але яго будуюць арганізацыі зь Віцебску. У савецкі час быў торфабрыкетны завод,
камбінат будаўнічых матэрыялаў, сёньня няма гэтых прадпрыемстваў. Няма асобна
сельгасхіміі, райаграснабу няма, райсельгастэхнікі – яны аб’яднаныя ў адзін
калектыў. І калі раней толькі ў райсельгастэхніцы працавала больш за 300
чалавек, то зараз у такім супольным калектыве 200. А гэтыя ж людзі ня зьехалі,
яны жывуць тут. Атрымаць дапамогу на адкрыцьцё ўласнай справы складана, грошай
у гарадзкім бюджэце на гэта няма”.
“Выратаваньне тапельцаў – справа рук саміх тапельцаў”, жартуе грамадзкі
актывіст з Браславу Кастусь Шыдлоўскі. Тут актыўна разьвіваецца экалягічны
турызм: “Значная колькасьць мясцовых жыхароў папросту атрымлівае там працу. Яны
працуюць і будаўнікамі, і вартаўнікамі, займаюцца абслугоўванньнем. Па-другое,
Браслаў – гэта памежная тэрыторыя, людзі маюць сваякоў у Латвіі, Літве і нейкім
чынам уладкоўваюцца там. Плюс магчымасьць яшчэ падзарабіць на трансгранічным
гандлі. У Браславе сытуацыя ўсё ж такі больш спрыяльная, таму што тапельцы, так
бы мовіць, маюць крыху больш саломінак для выратаваньня”.
Людміла Корсак
Этот адрес e-mail защищен от спам-ботов. Чтобы увидеть его, у Вас должен быть включен Java-Script
|
