|
Беларусь хоча інвэстыцыяў на 80 мільярдаў |
|
30.05.2008 |
|
Сёньня ў Менску адбылося пленарнае пасяджэньне
Кансультатыўнай рады па замежных інвэстыцыях пры Савеце міністраў
Беларусі. Прэм’ер Сяргей Сідорскі паабяцаў за бліжэйшыя 5 гадоў
прыцягнуць у беларускую эканоміку з-за мяжы 80 мільярдаў даляраў.
Наколькі рэальныя гэтыя пляны?
Сяргей
Сідорскі ў сваім выступе паабяцаў лібэралізацыю эканомікі, падмацаваную
стварэньнем спрыяльных умоваў для разьвіцьця малога і сярэдняга
бізнэсу, банкавай сыстэмы, удасканаленьнем падатковага і мытнага
заканадаўства:
“На бягучую пяцігодку ўрад краіны заплянаваў
павялічыць інвэстыцыі ў асноўны капітал у намінальным вылічэньні больш
як у чатыры разы. У эканоміку краіны плянуецца інвэставаць больш за 80
мільярдаў даляраў! Супраць 20 мільярдаў, якія былі засвоеныя за мінулае
пяцігодзьдзе.
У 2008-м мы чакаем інвэстыцыяў на ўзроўні 17 мільярдаў даляраў”.
Цяпер
у рэйтынгу інвэстыцыйнай прыцягальнасьці краінаў сьвету Беларусь займае
110 месца. Задача, акрэсьленая кіраўніком ураду, амбітная — за некалькі
гадоў трапіць у першую трыццатку.
Віцэ-прэм'ер Андрэй Кабякоў
назваў ужо рэалізаваныя сумесныя праекты з удзелам замежнага капіталу.
У бальшыні сваёй гэта расейскія грошы:
“У Беларусі цяпер
працуюць больш за 4 200 арганізацый з замежным капіталам з 68 краінаў
сьвету. Асноўнымі краінамі-інвэстарамі ў эканоміку Беларусі зьяўляюцца
Расея, Вялікабрытанія, Аўстрыя, Швэйцарыя, Нямеччына. З буйных праектаў
на стадыі завяршэньня знаходзіцца дамова з расейскай кампаніяй
“Ітэра-груп” на пабудову дзелавога цэнтра “Менск-сіці”. Аб'ём
укладаньняў — каля 6 мільярдаў даляраў. Заключанае пагадненьне з
расейскай фінансавай карпарацыяй “Сыстэма” дзеля разьвіцьця
радыёкасьмічных тэхналёгій, тэлекамунікацый, турызму і банкавага
сэктару. Забудову Парку высокіх тэхналёгій у Менску будзе ажыцьцяўляць
паўднёваафрыканская кампанія “Lyons Financial Solutions”, аб'ём
інвэстыцый — каля 700 мільёнаў даляраў. Мы вітаем уваход на беларускі
рынак кампаніі “Хайнекен”, якая набыла піваварны завод у Бабруйску”.
Некаторыя
госьці не хавалі свайго неразуменьня, якім чынам Беларусь будзе
дасягаць інвэстыцыйнай прывабнасьці. З аднаго боку, кіраўніцтва краіны
заяўляе пра лібэралізацыю эканомікі, а зь іншага — легалізавацца ў
Беларусі надзвычай складана. Прыкладам, прэзыдэнт бэльгійскай кампаніі
“Internationale Soint Industries” Навум Фураш заявіў, што не выпадае
чакаць масавага дэсанту да таго часу, пакуль у Беларусі будзе такі
моцны бюракратычны апарат. Патрабаваньні да інвэстараў фактычна
дублююцца цэлым шэрагам ведамстваў, з-за чаго ня толькі марнуецца час
дзелавых людзей, але і ствараецца той самы вобраз непрывабнай для
ўкладаньня грошай краіны.
Аднак
ня ўсіх патэнцыйных інвэстараў палохае тое, што Беларусь лічыцца
краінай з падвышанай інвэстыцыйнай рызыкай. Гаворыць адзін з
удзельнікаў форуму, кіраўнік літоўскай кампаніі “Біяновус” Рэмігіюс
Лапінскас:
“Мая кампанія зацікаўленая ў супрацоўніцтве ў сфэры
цьвёрдага біяпаліва. То бок мясцовыя рэсурсы, якія аднаўляюцца. І я
думаю, што ня трэба ў гэтай справе кіравацца стэрэатыпамі, а неабходна
глядзець на рэальныя факты і з гэтага рабіць якіясьці высновы. Для нас
самае галоўнае тое, што Беларусь мае вельмі багатыя рэсурсы для
вытворчасьці цьвёрдага біяпаліва, і ў прынцыпе, выкарыстоўваючы нашы
ноў-хаў, нашыя тэхналёгіі, якія ў нас рэальна ёсьць і выкарыстоўваюцца,
мяркую, што і тут тое ж магчыма зрабіць. Тым больш што дзейнічае
праграма на разьвіцьцё крыніцаў энэргетыкі, якія аднаўляюцца, у сыстэме
ўсёй энэргетыкі Беларусі, а таксама ў сыстэме жыльлёва-камунальнай
гаспадаркі. І гэта, напэўна, самае галоўнае”.
Спасылка |
